Та энд байна:

“Mongolian Mining Corporation”-ийн хувьцааны ханш сарын дотор 57.5 хувиар өслөө 

БНХАУ-ын боомтын хяналт, шалгалт нэмэгдсэнтэй холбоотойгоор Монголоос БНХАУ-д нийлүүлж байгаа нүүрсний тээвэр удаан хугацаагаар саатаж байгаа талаарх мэдээлэл гарсаар байна. БНХАУ-ын талын энэхүү хяналт шалгалтад Гашуунсухайт-Ганцмодны боомт хамгийн их өртөж байгаа аж. Тус боомтод өдөрт нийлүүлж байгаа нүүрсний хэмжээ 2.5 дахин багассан болохыг БНХАУ-ын Гаалийн ерөнхий газрын мэдээллээс харж болохоор байна. Энэ боомтоор Тавантолгойн бүлэг ордод үйл ажиллагаа явуулж байгаа компаниуд нүүрсээ экспортолж байна. “Mongolian Mining Corporation”-ийн хувьцааны ханш Хонгконгийн Хөрөнгийн биржийн өнөөдрийн арилжаагаар 1.56 хувиар буурсан байна. Хэдий тийм боловч сүүлийн нэг сарын хугацаанд 57.5 хувиар өсжээ. Энэ нь тус компани оны эхний хагас жилд 250-375 сая ам.долларын ашиг олсон байх төлөвтэй байгаагаа танилцуулсан нь эергээр нөлөөлжээ. Үүнээс гадна Шивээхүрэн-Сэхэ боомтоор “Southgobi Resources” компани Овооттолгойн нүүрсийг экспортолж байна. Тус компанийн хувьцааны ханш Хонгконгийн Хөрөнгийн биржид сүүлийн нэг сарын дотор 2.44 хувиар буурчээ.

Харин Хөшөөтийн уурхайгаас Бичигтийн боомтоор дамжуулан нүүрсээ Тяньжин руу экспортолж байгаа “Mongolia Energy Corporation”-ийн хувьцаа сүүлийн нэг сард 4.29 хувиар буурсан байна. Тавдугаар сард БНХАУ-ын Take-Shiken боомтын үйл ажиллагааг сэргээн засварлах шаардлагатай болсноос үүдэж “Mongolia Energy Corporation” нүүрсээ хэвийн нийлүүлэхэд хүндрэлтэй болжээ. Хэдий тийм боловч зургаадугаар сараас экспорт хэвийн болж эхэлсэн байна.

Эх сурвалж: BloombergTV.mn