Та энд байна:

TRQ: “Оюу толгой”-ийн гүний уурхайн олборлолт эхэлснээр зэсийн гурав дахь том төсөл болно 

“Оюу Толгой”-ийн гүний уурхайн олборлолт эхэлснээр дэлхийн хэмжээнд зэсийн гурав дахь том төсөл болно гэж “Turquoise Hill Resources” компани хөрөнгө оруулагчдад хандан гаргасан илтгэлдээ дурдлаа. Олон улсын хэмжээнд дунд хугацаандаа зэсийн эрэлт нэмэгдэж, 2018-2019 онд зах зээлд илүүдэл бий болно гэждүгнэсэн байна. “Оюу Толгой” компани 2017 онд V босоо ам, 2021 он гэхэд III, IV босоо амны агааржуулалтын системийг бүрэн байгуулж дуусгахаар төлөвлөж байгаа аж. Мөн гүний уурхайн бүтээн байгуулалтын зарцуулалтыг 2020 онд хамгийн их буюу 1.3 тэрбум ам.долларт хүрнэ гэж тооцоолсон байна. Харин “Rio Tinto”-оос "2020 оны дунд үеэс гүний уурхайн олборлолтыг хийж, 2027 он гэхэд гол баяжмалаа үйлдвэрлэж эхэлнэ" гэж тооцоолжээ. Харин “Deutsche Bank” гүний уурхайн гол олборлолт 2024 оны эцсээр эхэлнэ гэсэн судалгааг өмнө нь танилцуулсан юм.

Үүнээс гадна Торонтогийн Хөрөнгийн биржид бүртгэлтэй “Centerra Gold” компани хөрөнгө оруулагчдад хандан гаргах илтгэлээ танилцуулсан байна. Илтгэлд дурдсанаар Гацууртын ордтой холбоотой хөрөнгө оруулалтын гэрээг байгуулах хэлэлцээр үргэлжилж байгаа ажээ. Хэрэв батлагдвал түүнээс хойш 12-18 сарын дараа олборлолтоо хийх боломжтой гэж үзсэн байна. Энд тонн хүдэр тутамд 2.9 грамм алтны агууламжтай гэж үзэж байгаа талаар дурджээ. Хамгийн сүүлд Торонтогийн Хөрөнгийн биржид “Centerra Gold”-ийн хувьцааны ханш 2.9 хувиар нэмэгдэж, 7.1 канад доллар болж хаагдсан байна. Үүнээс гадна Австралийн Хөрөнгийн биржид бүртгэлтэй “Eumeralla Resources” компани “Ausmex Mining” компанийн хувьцааг худалдан авах хэлэлцээрт орсон байна. “Eumeralla Resources” компани Монголд Чулуун хороот вольфромын ордын тусгай зөвшөөрлийг эзэмшиж байгаа юм.

 Эх сурвалж: Bloombergtv.mn