Та энд байна:

2030 он гэхэд Кобальтын эрэлт 30 дахин өснө 

Цахилгаан автомашины цэнэг хураагуурыг үйлдвэрлэхэд шаардлагатай кобальтын нийлүүлэлтийн өрсөлдөөн ширүүслээ. Ялангуяа "Glencore" болон Бүгд Найрамдах Ардчилсан Конго улс зэрэг зах зээлийн томоохон тоглогчдын дунд энэ нь шинэ төрлийн өрсөлдөөн бий болгож байгаа юм. Австрали, АНУ болон Канад улсад өнгөрсөн онд кобальтын ханш хоёр дахин өссөний дараа эдгээр улсуудад энэ төрлийн төсөл хөтөлбөрүүд аюултай хэмжээнд хүрээд байна. "Glencore"-ийн хувьд дэлхийн нийт кобальтын нийлүүлэлтийн гуравны нэг орчмыг хангадаг. Харин Конго улс кобальтын 65 орчим хувийг бүрдүүлдэг, их хэмжээний нөөцтэй аж. Хэдий тийм боловч Конгогийн зах зээлийн ширүүн өрсөлдөөн цахилгаан автомашины цэнэг хураагуур болон автомашин үйлдвэрлэгчдэд сэтгэл зовох шалтгаан болж байна. Цэнэг хураагуураар ажилладаг цахилгаан автомашины эрин үе ирсэн нь төмөрлөгийн зах зээлд таамаглашгүй өсөлтийг бий болгосон гэж "Glencore"-ийн маркетингийн ахлах Фрэнк Шулдерс нэгэн ярилцлагадаа дурджээ.

Үүнээс гадна 2030 он гэхэд кобальтын эрэлт 30 дахин өснө гэж "Bloomberg New Finance Energy" мэдээлсэн байна. “Volkswagen”, “Ford” зэрэг автомашин үйлдвэрлэгчид цахилгаан автомашинд оруулж буй хөрөнгө оруулалтдаа ихээхэн хэмжээний анхаарал хандуулж байгаа юм. Энэ ч утгаараа цахилгаан автомашины зах зээл 2025 он гэхэд 244 тэрбум ам.доллараар хэмжигдэнэ гэж "Goldman Sachs Group" 2015 оны сүүлээр гаргасан тайландаа тусгажээ. Харин нийлүүлэлтийн хомсдолоос шалтгаалан кобальтын ханш энэ онд хоёр дахин өснө гэж "CRU Group" тооцоолсон байна.

Эх сурвалж: Bloombergtv.mn