Та энд байна:

Aspire Mining: Нүүрстэй ордод ил уурхайн аргаар олборлолт явуулах боломжтой 

Австралийн Хөрөнгийн биржид бүртгэлтэй “Aspire Mining” компани "Нүүрстэй" төслийн судалгааны ажлын явцын талаар мэдээлэл гаргалаа. Судалгааны дүнд тус ордод ил уурхайн аргаар олборлолт явуулах боломжтой гэж гарсан байна. Цаашид илүү нарийвчилсан судалгаа хийх шаардлагатайгаас гадна, ашиглалтын тусгай зөвшөөрөл авах шаардлага үүсээд байгаа ажээ. Нүүрстэй ордод нийт 8.1 сая тонн сайн чанарын коксжих нүүрсний нөөцтэй гэж гарсан байна. Коксжих нүүрсний үнэ огцом өссөн нь тус компани төслийг хөгжүүлэхэд дэмжлэг болжээ. Мөн цаашид “Aspire Mining” дээрх төсөл дэх 45 хувийн эзэмшлийн хувиа 90 хувьд хүргэх опшн эрхтэй байгаа аж. Мөрөн хотоос холгүй орших Нүүрстэй төсөл нь “Aspire Mining” компанийн хэрэгжүүлж байгаа Эрдэнэт Овоот чиглэлийн төмөр замын ашигт ажиллагаанд чухал нөлөөтэйд тооцогдож байгаа юм.

Харин Торонтогийн Хөрөнгийн биржид бүртгэлтэй “Centerra Gold” компани “Thompson Creek Metals” компанийн бүх хувьцааг шилжүүлж, өөртөө нэгтгэсэн байна. Мөн “Thompson Creek Metals”-ийн 890 орчим сая ам.долларын өрийг даржээ. Ингэснээр “Thompson Creek Metals” компанийн хувьцаа эзэмшигчид “Centerra Gold”-ийн найман хувийг эзэмших болж байгаа юм. Канадын Хөрөнгийн биржид бүртгэлтэй “Thompson Creek Metals” компани 26 тонн алтны нөөцтэй уурхай эзэмшдэгээс гадна молибдены хоёр орд болон хэд хэдэн үл хөдлөх хөрөнгө эзэмшдэг байна.

 Эх сурвалж: Bloombergtv.mn