Та энд байна:

TRQ: “Оюу Толгой”-ийн баяжмал дахь зэсийн гарц 2017-2025 онд 320 хувиар нэмэгдэнэ 

Нью-Йорк, Торонтогийн Хөрөнгийн биржид бүртгэлтэй “Turquoise Hill Resources” компани хөрөнгө оруулагчдад хандан “Оюу Толгой”-ийн үйл ажиллагааны явцын талаар танилцууллаа. Дэлхийн хэмжээнд зэсийн гурав дахь том уурхай болох төлөвтэй байгаа “Оюу Толгой” ордын хувьд 2017-2025 онд зэсийн бүтээгдэхүүний гарц нь 320 хувиар нэмэгдэх хүлээлттэй байгаа юм. Харин алтны гарц нь 450 хувиар нэмэгдэнэ гэж “Turquoise Hill Resources” тооцоолжээ.

2024-2026 онд “Оюу Толгой”-ийн зэсийн баяжмалын гарц оргил түвшинд хүрч, жилд 600 мянган тонн баяжмал үйлдвэрлэхээр тооцож байна. Харин 2024-2036 онд жилд дунджаар 500 мянган тонныг үйлдвэрлэх төлөвтэй байгаа ажээ. Одоогоор “Оюу Толгой”-ийн гүний уурхайн бүтээн байгуулалтын ажил үргэлжилж байна. Энэ оны I улиралд гүний уурхайн хөндлөн нэвтрэлт, II ба V босоо амны нэвтрэлт, дэд бүтцийн болон налуу амны ажлуудад нэлээд ахиц гарсныг “Оюу Толгой” компани мэдээллээ. Цаашид олон улсын зах зээлд дунд хугацаанд зэсийн эрэлт нэмэгдэх хүлээлттэй байгаа, 2017 онд зэсийн зах зээл алдагдалд орох боловч 2018 оноос эхлэн тэнцвэрээ олж эхэлнэ гэж "Wood Mackenzie" байгууллага тооцоолсон байна. Харин “Turquoise Hill Resources”-ийн тухайд Торонтогийн Хөрөнгийн биржид нэгж хувьцааны ханш нь 3.34 канад доллар болжээ. Сүүлийн нэг жилийн хугацаанд ханш нь 22.5 хувиар сулраад байна.

Эх сурвалж: BloombergTV.mn